زهر و نهر "قصة قصيرة" من سلسلة حكايات ماما زوزو

 زهر ونهر

كان يا ما كان يا سعد يا اكرام ما يحلى الكلام الا بذكر النبى عليه الصلاة والسلام

فى عصر قريب مش بعيد .. وقلب وفى أكيد .. كان فيه بنوتة جميلة اسمها ندا وكمان كان فيه صديقتها ماما زوزو وفى حديقة البلد كان فيه زهور مالهاش عدد .. لها أشكال وألوان كتيرة .. قربت ماما زوزو شوية تختار زهرة جميلة ندية تقدمها لصديقتها الجميلة ندا هدية .. وفجأة .. من غير تفكير الزهرة وقعت من ايدين ماما زوزو فى الميه.. وماما زوزو كانت زعلانة وعيونها طايرة ورا الزهرة الغرقانة .. وتقوللها يا زهرة يا ندية .. أوعى تغرقى فى الميا .. أنا كنت هقدمك هدية .. لأجمل وأغلى صديقة وفية .. أستنى يا زهرة ما تغرقيش .. 

إخترتك بيضاء وصافية .. لأجل عيون صديقتى الجميلة الدافية ..وبسرعة ظهر الاستاذ الجميل الكريم أشرف .. ومد ايده فى الميه .. وخطف الزهرة الندية اللى هتقدمها ماما زوزو لصديقتها الجميلة ندا هدية .. وقاللها : وردتك الندية يا ماما زوزو .. 

أنقذتها من الميه علشان خاطر ندا الوفية .. ماما زوزو فرحت جدا لإنقاذ الزهرة الندية .. وشكرت أستاذ أشرف انه قدر يحافظ على الهدية .. علشان خاطر الجميلة ندا الوفية. 

وفعلا ماما زوزو أخدت الزهرة الندية .. وقدمتها لصديقتها الجميلة ندا هدية .. وفرحوا الاصدقاء كلهم وكانت ضحكتهم مدوية .. 

وقرروا يوجهوا رسالة لكل الناس .. إن التعاون بين الاصدقاء بيسبب سعادة جماعية .. زى سعادة ندا الجميلة .. بهديتها الزهرة الندية .. زهرة ندا ..

وتوتة توتة خلصت الحدوتة

ماما زوزو