تجربة ال 5 قرود المشهورة
تجربة ال 5 قرود المشهورة!
الأسبوع الأول:
1. العلماء حطّوا 5 قرود في قفص فيه سلّم وفوقه شوية موز.
2. كل ما قِرد يحاول يطلع للموز، العلماء يعاقبوا ال 4 قرود التانيين: يرشّوا عليهم مَيّه باردة زي التلج.
3. فينقض ال 4 قرود بالضرب والعقاب والشلاليت على القرد المغامر ويبعدوه عن السلم بالعافية.
4. بعد فترة القرود بطّلوا يحاولوا بسبب خوفهم من: أ- العقاب الخارجي *الماء الزمهرير* ب-عقابهم لبعضهم *الضرب والشلاليت*.
الأسبوع التاني:
أمْن وأمان واستقرار. وكَسَل وبلادة وعدم محاولة.
الأسبوع التالت:
5. العلماء استبعدوا قرد قديم. ودخّلوا مكانُه قرده جديده.
6. فوراً طارت ناحية الموز.
7. وفوراً اترقعت علقة ما خدهاش حُمار في مَطْلع -ومن ساعتها حرّمت تهوّب ناحية السلم. مع إنها مش عارفه أقاموا الحد عليها ليه!
الأسبوع الرابع:
8. العلماء كرروا نفس التجربة: شالوا قرد تاني قديم ودخّلوا مكانُه قرد طازه جديد.
9. وكالمتوقع جرى ع السلم ناحية الموز. وكالمتوقع اتلطّش.
10. لكن الغير متوقَّع إن اللي شارك في تلطيشه مين؟ القرده اللي انضربت ولسا بتهرش في دماغها مش عارفه ضربوها ليه.
الأسبوع الخامس:
11. استبدلوا كل طقم القرود القديمه (اللي حضرت رش المَيّه)، بجيل جديد ما حضرْش رش الميه خالص.
12. ومع ذلك مازال الموز فوق السلم تتطلّع إليه الأنظار في تقديس ووجل وإجلال.
اللي تسوّل له نفسُه ويسأل عن السبب يتلطّش.
كُلّه مرعوب مِن لمْس الفاكهه المحرَّمه.
الاستنتاج:
13. فالعلماء بيقولوا دي أسهل وسيلة لصناعة الغباء.
لو عاوز تصمم جيل مطيع كالقطيع يبقى لازم تزرع فيهم نوعين من الخوف:
١. خوف من عقاب غيبي مَصدرُه مجهول.
٢. وخوف من عقاب دنيوي قاسي مصدره معروف.
عشان يحرّموا يسألوا عن أشياء.
14. وبيقولوا لو سألت أحد القرود:
س. إنتو بتعملوا في بعض كده ليه؟ جوابهم غالباً حيكون:
ج. لا ندري ولكن هكذا وجدنا آباءنا وأجدادنا.
15. النسخة البشرية من التجربة لا تختلف كثيراً:
اللي بيستظرف ويستخف دمّه بيسَمّوه "مزدري" أومسيء ويحبسوه في قفص بتهمة المساس بالثوابت الموروثة من آباءنا وأجدادنا، واللي هي Common Sense, يعني *الحاجات المعلومة بالضرورة*. يعني *المعروفة كدهو*.
***
أسئلة مطروحة:
* سنة كام بدأ رَش المية على آباءنا وأجدادنا في مصر؟
* إمتى بثّوا فيهم الرُّعب والتخويف؟
* إمتى حكوماتنا وأهالينا وشيوخنا وأولياء أمورنا شَغَّلُوا الضرب في بعض؟
* هُمّا بيضربوا ب افترا وغضَب كده ليه؟ هُما عقابهم قاسي قوي كده ليه؟
* ليه لسانهم سليط؟ وليه كلامهم سافل؟
* ليه بيحدّفوا بعنف ويرجموا بعنف ويدبحوا بعنف ويحرقوا بعنف؟
* ليه بيضربوا الرِّقاب؟ ليه بيقتلوا اللي يراجع نفسُه ويغيّر رأيه ويرُدّ في كلامه؟
* ليه بيحتلّوا بلدك؟
* ليه بيحتلّوا عقلك؟
* ليه بيقتلوا طموحك؟
*ليه مخوّفينك؟ ليه مهدّدينك؟
* طب وانتا خايف ليه؟ مرعوب مِن إيه؟
مِن حاجه واحده بس:
من التغيير!
تعليقات
إرسال تعليق